अनिल पाटील,बोईसर
प्लास्टिकमुक्त व हिरवेगार पालघर जिल्हा करणार – पालकमंत्री नाईक
दुर्गंधी व प्लास्टिक मुक्त पालघर जिल्हा करण्यासाठी पर्यावरणाचे संतुलन राखणे आवश्यक आहे.त्यासाठी २५० कोटी झाडे लावण्याचा संकल्प शासनाचा असून या माध्यमातून हिरवागार पालघर जिल्हा पाहायला मिळेल,असे प्रतिपादन वनमंत्री तथा पालघर जिल्ह्याचे पालकमंत्री गणेश नाईक यांनी पालघर येथे केले.
स्वातंत्र्यदिनाच्या निमित्ताने वनमंत्री व पालघर जिल्ह्याचे पालकमंत्री गणेश नाईक यांच्या हस्ते प्राथमिक आरोग्य केंद्र दुर्वेश येथील मुख्य इमारत व कर्मचारी निवासस्थानाच्या बांधकामाचे भूमिपूजन संपन्न झाले.
या प्रसंगी खा.डॉ.हेमंत सवरा,आ.राजेंद्र गावित, आ.विलास तरे,जिल्हाधिकारी डॉ.इंदुराणी जाखड,जिल्हा परिषद,मुख्य कार्यकारी अधिकारी मनोज रानडे, पोलीस अधीक्षक यतीश देशमुख,दुर्वेश ग्रामपंचायतीचे सरपंच आकाश कडव,जिल्हा आरोग्य अधिकारी संतोष चौधरी,गटविकास अधिकारी राहुल काळभोर,तालुका आरोग्य अधिकारी तन्वीर शेख,समाजसेवक वसंत चव्हाण,समाजसेवक दामूशेठ पाटील यांसह जिल्हा परिषदेचे वरिष्ठ अधिकारी उपस्थित होते.पालकमंत्री गणेश नाईक आपल्या भाषणात म्हणाले, पालघर जिल्ह्याची निर्मिती केवळ कागदोपत्री नव्हे तर प्रत्यक्षात पायाभूत सुविधा उभारून झाली पाहिजे. जिल्हा रुग्णालय, जिल्हाधिकारी कार्यालय, जिल्हा परिषद कार्यालय, पोलीस अधीक्षक कार्यालय यांसारख्या इमारती उभारण्यात आलेल्या आहेत, शिक्षण,आरोग्य आणि इतर सेवा गतीने विकसित होत आहेत.
पालघर जिल्ह्याला प्लास्टिकमुक्त व दुर्गंधीमुक्त करण्यासाठी स्वच्छता मोहिम राबवण्यात आली असून, गावागावांतून प्लास्टिक संकलन व विघटनाचे काम करण्यात येत आहे.
राज्यातील १० कोटी वृक्षलागवड मोहिमेत पालघर जिल्ह्याचे उद्दिष्ट पूर्ण करण्यासाठी पुढील वर्षी आणखी वृक्ष लागवड करण्यात येणार आहे.डोंगर हिरवेगार करणे,रस्त्यांच्या कडेला विविध रंगांची व सुगंधी झाडे लावणे आणि २०० हेक्टर फॉरेस्ट जमीन सौंदर्यीकरणासाठी वापरण्याचे नियोजन असल्याचे प्रतिपादन पालकमंत्री गणेश नाईक यांनी केले.पालघर जिल्ह्यातील कोणतेही विकासकाम निधीअभावी थांबणार नाही. शासकीय यंत्रणा, लोकप्रतिनिधी व जनसहभाग यांच्या एकत्रित प्रयत्नांतून स्वच्छ,सुंदर आणि प्रगत पालघर जिल्हा उभारण्याचा आमचा संकल्प आहे,असे पालकमंत्री गणेश नाईक यांनी सांगितले.
पालकमंत्री गणेश नाईक यांनी वाडा तालुक्यातील गालतरे येथील इस्कॉन गोवर्धन इको व्हिलेज येथे भेट देऊन पाहणी केली.
