दीपक मोहिते,
गुजरातच्या समुद्रात अठराशे कोटीचे ड्रग्ज पकडले,
गुजरातच्या समुद्रात कोस्ट गार्ड आणि गुजरात एटिसच्या संयुक्त कारवाईत तब्बल १ हजार ८०० कोटी रु.चा ड्रग्जसाठा असणारी बोट पकडण्यात आली आहे.सुमारे ३०० कि.एमडी ड्रग्ज या बोटीतून जप्त करण्यात आले आहे.ही कारवाई महाराष्ट्र आणि गुजरातच्या सीमेवर समुद्रात करण्यात आली आहे. नार्कोटिक्स विभागाच्या
सूत्रांनी दिलेल्या माहितीनुसार,ही बोट रात्रीच्या अंधारात समुद्रातून पाकिस्तानच्या दिशेने भारतात येत होती,अशी प्राथमिक माहिती आहे.कोस्ट गार्डच्या स्पीड बोट्स आणि मोठ्या जहाजांनी सिनेमा स्टाईल कारवाई करत ही बोट थांबवली आणि तिची कसून तपासणी केली असता बोटीत मेथॅम्पेटामिन ( एमडी ड्रग्ज ) हे ड्रग्ज असल्याचं समोर आलं आहे.ही अत्यंत घातक आणि महागडी ड्रग आहे. आंतरराष्ट्रीय बाजारात या ड्रग्जची किंमत सुमारे १ हजार ८०० कोटी रु.इतकी आहे.
१२ व १३ एप्रिल रोजी रात्री करण्यात आलेल्या या कारवाईत तटरक्षकाला रात्रीच्या काळोखात एक संशयित बोट जवळ येत असल्याचे आढळले.सतर्क झालेल्या तटरक्षकाच्या बोटीने संशयित बोटीचा पाठलाग केला असता,तटरक्षक दलाच्या पथकाला समुद्रात टाकण्यात आलेले अंमली पदार्थ आढळून आले.त्यानंतर जप्त केलेले अंमली पदार्थ पुढील तपासणीसाठी आयसीजी जहाजाने पोरबंदरला आणण्यात आले आहे.गुजरात एटीएसच्या मदतीने ही मोहीम राबवण्यात आली.कारवाईदरम्यान बोटीत असलेल्या काही संशयितांना ताब्यात घेण्यात आले आहे. त्यांची सध्या कसून चौकशी सुरू आहे.
तब्बल १ हजार ८०० कोटी रु.चे ड्रग्ज असणारी मासेमारी बोट पश्चिम बंगालमधील काकद्वीप मासेमारी बंदरात नोंदणीकृत होती.तपासणी दरम्यान,ती वैध नोंदणी कागदपत्रांशिवाय असल्याचे आढळून आले.याव्यतिरिक्त, जहाजावरील १४ भारतीय क्रू सदस्यांपैकी एकाही सदस्याकडे मासेमारीसाठी आवश्यक असणारी अधिकृत कागदपत्रे नव्हती.जहाजातील कर्मचाऱ्यांनी पाच दिवसांपासून समुद्रात असल्याचा दावा केला असला तरी बोटीत मासेमारीचे कोणतेही साहित्य नव्हते आणि मासे पकडण्याचे साधनही आढळले नाही. त्यामुळे गुजरातचे एटीएस आणि कोस्ट गार्डच्या संयुक्त कारवाईत सापडलेली ही बोट तस्करीसाठीच वापरण्यात आल्याचे उघड झाले आहे.
