दीपक मोहिते,
वर्षानुवर्षे रखडलेली प्रलंबित विकासकामे जलदगतीने मार्गी लागणार – आ.स्नेहा दुबे पंडित,
वसई विधानसभा मतदारसंघातील वर्षानुवर्षे प्रलंबित असलेली विकासकामे वेगाने मार्गी लागावी, यासाठी आ.स्नेहा दुबे पंडित यांनी काल पुन्हा मुख्यमंत्री देवेंद्र फडणवीस यांची भेट घेऊन सविस्तर चर्चा केली.
वसईतील महत्वाचे रस्ते, उड्डाणपूल व रेल्वे ओव्हर ब्रिजच्या कामांना गती देण्यासाठी काल पुन्हा वर्षा या मुख्यमंत्री देवेंद्र फडणवीस यांच्या सरकारी निवासस्थानी जाऊन त्यांची भेट घेतली.वसई विरार शहर महानगरपालिका क्षेत्रातील मुख्य रस्त्यांचे काँक्रीटीकरण, उड्डाणपूल तसेच रेल्वे ओव्हर ब्रीजचे प्रस्ताव गेल्या काही वर्षांपासून प्रलंबित आहेत. वसईच्या आमदार म्हणून निवडून आल्यावर नागपूर येथे झालेल्या पहिल्याच हिवाळी अधिवेशनात आ.स्नेहा दुबे पंडित यांनी या प्रश्नावर शासनाचे लक्ष वेधले होते.त्यानंतर याविषयी शासन आणि एम.एम.आर.डी.ए. यांच्याशी सातत्याने पत्रव्यवहार आणि बैठका आयोजित करून या प्रलंबित प्रश्नांचा पाठपुरावा सुरु ठेवला आहे.या अनुषंगाने आ.स्नेहा दुबे पंडित यांनी एम.एम.आर. डी.ए.च्या मुख्यालयातील अधिकाऱ्यांसोबत बैठक घेऊन या प्रस्तावांबाबत सविस्तर चर्चा केली.या चर्चेदरम्यान महानगरपालिकेकडून पाठवण्यात आलेल्या प्रस्तावांमध्ये अनेक त्रुटी असल्याचे आढळून आले. यामुळे २५ सप्टें.रोजी आ.स्नेहा दुबे पंडित यांनी पुन्हा एम.एम.आर.डी.ए.चे अधिकारी आणि महानगर पालिकेच्या बांधकाम विभागाचे अधिकारी यांची महानगरपालिकेच्या मुख्यालयात संयुक्त बैठक घेऊन या प्रस्तावांच्या आराखड्यावर सविस्तर चर्चा केली.यावेळी प्रस्तुत आराखडे सुधारित करणे, त्यामधील त्रुटी दूर करून परिपूर्ण प्रस्ताव २ दिवसात एम.एम.आर.डी.ए.कडे पाठवण्याच्या सूचना दिल्या. त्यानुसार या सर्व प्रस्तावातील त्रुटी दूर करून महानगर पालिकेने दोन दिवसापूर्वी एम.एम.आर.डी.ए.कडे प्रस्ताव सादर केले.
त्यानुसार या प्रस्तावांना त्वरीत मान्यता देण्यासाठी आ.स्नेहा दुबे पंडित यांनी पुन्हा वर्षा या निवासस्थानी जाऊन मुख्यमंत्री महोदयांची नुकतीच भेट घेऊन त्यांच्याशी चर्चा केली व या प्रस्तावांना त्वरीत मान्यता देण्याची त्यांना विनंती केली.
मुख्यमंत्री फडणवीस यांनीही वसई तालुक्यातील रस्त्यांची दुरवस्था आणि वाहतूक समस्या याकडे आपले लक्ष असून एम.एम.आर.डी.ए.च्या प्रस्तावांना त्वरेने मान्यता देण्यात येईल,असे सांगितले.
या भेटीनंतर वसई विधानसभा मतदारसंघातील वर्षानुवर्षे रखडलेली प्रलंबित विकासकामे लवकरात लवकर मार्गी लागणार असल्याचे आ. दुबे पंडित यांनी प्रसिद्धीस दिलेल्या पत्रकात म्हंटले आहे.
