जव्हार प्रतिनिधी
जामसर येथे जागतिक क्षयरोग दिनानिमित्त जनजागृती कार्यक्रमाचे आयोजन,
जेएसडब्ल्यू फाउंडेशन फेलोशिप कार्यक्रमांतर्गत ” टीबी मुक्त गाव जनजागृती कार्यक्रम,” योजनेचा एक भाग म्हणून ग्रामपंचायत जामसर येथे जागतिक क्षयरोग दिनानिमित्त विविध जनजागृती उपक्रमांचे आयोजन करण्यात आले.
यावेळी जव्हारमधील श्री गजानन महाराज कॉलेज ऑफ नर्सिंग अँड रिसर्च सेंटरमधील विद्यार्थी सात दिवस चाललेल्या क्षयरोगविषयक जनजागृती मोहिमेत सहभागी झाले होते.
या मोहिमेअंतर्गत क्षयरोग जनजागृतीपर गीते,पथनाट्य आणि आरोग्यविषयक चर्चासत्रे आयोजित करण्यात आली.तसेच क्षयरोग निदानासाठी चाचणी सुविधांची उपलब्धता, टोल-फ्री संपर्क क्रमांक आणि क्षयरोगाची लक्षणे ओळखण्याबाबत आवश्यक पावले यावरही मार्गदर्शन करण्यात आले.थुंकीचे नमुने गोळा करण्याची प्रक्रिया, प्रथिनेयुक्त आहाराचे महत्त्व, डॉट्स उपचार पद्धतीची माहिती आणि निकष,पोषण योजनेबाबत माहिती विद्यार्थ्यांना देण्यात आली.जेएसडब्ल्यू फाउंडेशन फेलो अभिषेक सागर यांनी या कार्यक्रमाचे आयोजन केले होते.
विद्यार्थ्यांचा आणि आरोग्य कर्मचाऱ्यांचा गौरव
सामुदायिक जनजागृती मोहिमेत प्रशंसनीय योगदान दिल्याबद्दल श्री गजानन महाराज कॉलेज ऑफ नर्सिंग अँड रिसर्च सेंटरच्या विद्यार्थ्यांना प्रमाणपत्र वितरण करण्यात आले. तसेच, आरोग्यवर्धनी केंद्र,वडपाडा आणि ग्रामपंचायत जामसर यांच्या सहकार्याबद्दल स्मृतीचिन्ह देऊन त्यांचा सन्मान करण्यात आला.
प्रमुख मान्यवरांमध्ये वडपाडा आरोग्यवर्धनी केंद्राच्या टीमसह सामुदायिक आरोग्य अधिकारी (सीएचओ) सुश्री ऐश्वर्या भोईर, सहाय्यक परिचारिका आणि मिडवाइफरी (एएनएम) श्रीमती एस. एल. अवतार, तसेच बहुउद्देशीय आरोग्य कर्मचारी (MPW) पी.वाय. भरसट उपस्थित होते. ग्रामसभा सदस्य आणि स्थानिक नागरिकांनीही या कार्यक्रमाला भरभरून प्रतिसाद दिला.कार्यक्रमाचे सूत्रसंचालन विवेक शहारे यांनी केले,तर प्रकल्प मार्गदर्शक श्रीमती संगिता मालशे यांनी उपस्थितांचे आभार मानले.
